ក្ដៅ​ៗ​ជុំវិញ​រដ្ឋប្រហារ​យោធា​ថៃ​នៅ​ថ្ងៃ​នេះ

ឧត្តមសេនីយ៍​ Prayut ក្នុង​ថ្លែង​ក្នុង​ពិធី​តែងតាំង

ទីបំផុត មេដឹកនាំ​រដ្ឋប្រហារ​យោធា​ថៃ ឧត្តមសេនីយ៍ Prayut Chan-O-Cha ទទួល​បាន​រាជានុញ្ញាត​ពី​ព្រះមហាក្សត្រ​ថៃ Bhumibol Adulyadej តាំង​តាំង​ជា​ប្រមុខ​រដ្ឋាភិបាល​យោធា។
កាល​ពី​ព្រឹកមិញ ឧត្តមសេនីយ៍ Prayut ត្រូវ​បាន​តាំង​តាំង​ជា​ប្រធាន​ក្រុមប្រឹក្សា​ជាតិ​សន្តិភាព និង​សណ្ដាប់ធ្នាប់ ជា​ផ្លូវ​ការ​ក្រោម​ការ​បើក​ភ្លើង​ខៀវ​របស់​ព្រះមហាក្សត្រ។

ការ​តែងតាំង​នេះ មាន​ន័យ​ថា ឧត្តមសេនីយ៍ Prayut បាន​ក្លាយ​ជា​ប្រមុខ​រដ្ឋាភិបាល​យោធា ឬ​ក្រុម​ប្រឹក្សា​យោធា​ជា​ផ្លូវការ ដោយ​មាន​ស្ថាប័ន​ព្រះមហាក្សត្រ​ដ៏​ធំ និង​មាន​ឥទ្ធិពល​ជាង​គេ​ទទួល​ស្គាល់។
ក្នុង ​ពិធី​តែងតាំង មេដឹកនាំ​យោធា​រូប​នេះ​បាន​សច្ចា​ថា​នឹង​អនុម័ត​ច្បាប់​យ៉ាង​ម៉ឺងម៉ាត់ ដើម្បី​ដោះស្រាយ​វិបត្តិ​នយោបាយ​ថៃ និង​គូស​បញ្ជាក់​ថា លោក​នឹង​”គ្មាន​ជម្រើស​ផ្សេង” ក្រៅ​ពី​ប្រើ​កម្លាំង​បាយ បើ​សិន​បាតុកម្ម​នយោបាយ​បន្ត​ឆាបឆេះ​ហែកហួរ​ក្នុង​ប្រទេស។

ងាក​មក​មើល​ព្រឹត្តិការណ៍​មួយ​ទៀត​ក្នុង​ថ្ងៃ​នេះ​ដដែល គឺ​មេដឹកនាំ​មហា​បាតុកម្ម​ប្រឆាំង​នឹង​រដ្ឋាភិបាល​លោក​ស្រី​ យីងឡាក់ ដែល​ត្រូវ​បាន​ធ្វើ​រដ្ឋប្រហារ​យោធា​កាល​ពី​សប្ដាហ៍​មុន ត្រូវ​បាន​តុលាការ​ដោះលែង​ ដោយ​បង់​ប្រាក់​ធានា​ក្រៅ​ឃុំ។
លោក Suthep Thaugsuban មេដឹកនាំ​ក្រុម​អាវ​លឿង​ដែល​ប្រឈម​នឹង​ការ​ប្រកាន់​ពី​បទ​បះបោរ និង​ឃាតកម្ម​លើ​ក្រុម​អាវ​ក្រហម​កាល​ពី​ឆ្នាំ​២០១០ “ឥឡូវ​នេះ​ត្រូវ​បាន​ដោះលែង​ឲ្យ​ទៅ​ផ្ទះ​ហើយ”។ នេះ​បើ​យោង​តាម​មេធាវី Bandit Siripan។ ប៉ុន្តែ លោក​ត្រូវ​ហាម​មិន​ឲ្យ​ចាកចេញ​ពី​ប្រទេស។Suthep ត្រូវ​បាន​ចាប់​ឃុំ​កាល​ពី​រដ្ឋប្រហារ​ថ្ងៃ​ព្រហស្បតិ៍​សប្ដាហ៍​មុន ជាមួយ​នឹង​ឥស្សរជន​នយោបាយ​ផ្សេង​ៗ​ទៀត ៕